बल्खु सुकुम्बासी बस्ती घटनाप्रति रास्वपा सांसद मनिष खनालको गहिरो चिन्ता, “विस्थापन होइन सुरक्षित व्यवस्थापन” मा जोड

सत्तारूढ राष्ट्रिय स्वतन्त्र पार्टी (रास्वपा) का सांसद मनिष खनालले सुकुम्बासी तथा अव्यवस्थित बसोबासको समस्या समाधान गर्ने क्रममा भएका घटनाले आफूलाई स्तब्ध बनाएको बताएका छन्।
नवलपुर क्षेत्र नम्बर २ बाट निर्वाचित प्रतिनिधिसभा सांसद खनालले शुक्रबार राति फेसबुकमार्फत् आफ्नो धारणा सार्वजनिक गरेका हुन्।
उनले 'राज्यका लागि हरेक नागरिकको जीवन र आत्मसम्मान सबभन्दा अमूल्य विषय हो' भन्दै सुकुम्बासी तथा अव्यवस्थित बसोबासको समस्या समाधान गर्ने क्रममा शुक्रबार भएको घटनालाई दु:खद भनेका छन्।
शुक्रबार काठमाडौंको बल्खु किनाराको सुकुम्बासी बस्तीमा डोजर चल्दै गर्दा त्यहीँ बस्दै आएका इन्द्रबहादुर राई मृत अवस्था फेला परेका थिए। अपराह्न साढे ३ बजे ६१ वर्षीय राईको शव बागमती नदीले बगाएर ल्याएको प्रहरीले बताएको छ।
'हामीले सधैं 'विस्थापन होइन, सुरक्षित व्यवस्थापन' को मान्यतालाई प्राथमिकता दिँदै आएका छौं। यद्यपि, एउटा बस्तीको व्यवस्थापन गर्ने क्रममा त्यहाँका बालबालिकाको पढाइ, नागरिकको स्वास्थ्य र परिवारले भोग्नुपर्ने मानसिक तनावका विषयमा हामी सबैले अझ बढी संवेदनशीलता अपनाउनुपर्ने महसुस गरेको छु,' उनले लेखेका छन्।
उनी अगाडि लेख्छन्, 'हामी आज जुन जिम्मेवारीमा छौं, त्यो तिनै आदरणीय नागरिकको अटुट विश्वास र भरोसाकै कारण सम्भव भएको हो भन्ने तथ्यलाई हामीले सधैं हृदयमा राख्नुपर्छ।'

'हाम्रा प्रयासहरूले कोही पनि नागरिकलाई पीडा नहोस् र सबैको आत्मसम्मानको रक्षा होस् भन्नेमा हामी सचेत छौं, रहौं। सुरक्षित बसोबासको लक्ष्य बोकेको सरकारले यसको व्यावहारिक कार्यान्वयन गर्दा 'न्याय गरेर मात्र पुग्दैन, न्याय भएको आभास पनि हुनुपर्छ' भन्ने मान्यतालाई अझ प्रगाढ बनाउँदै लैजाओस् भन्ने मेरो चाहना छ,' सांसद खनालको भनाइ छ।
सरकारको दृष्टि सबैमा पुगोस् र यसमा सजगता अपनाउनेछ भन्ने विश्वास पनि उनले व्यक्त गरेका छन्।
खनालले मृतकप्रति भावपूर्ण श्रद्धाञ्जलि अर्पण गर्दै शोक सन्तप्त परिवारजनमा गहिरो समवेदना व्यक्त गरेका छन्।